सेतो क्लोभरको विवरण

सेतो क्लोभर : Trifolium repens
जात : प्याउली

यो घाँसबाट राम्रो उत्पादन लिनको लागि प्रति रोपनी १०–१५ डोको गोबर मल र ७ किलो डि.ए.पीे. मल प्रयोग गर्नुपर्दछ । मल जमिनको अन्तिम तयारीको समयमा बिउ छर्नु भन्दा अगाडी प्रयोग गर्नु पर्दछ । फुल फुल्ने समयमा र हरेक कटानपछि सिंचाई गर्न सके राम्रो उत्पादन लिन सकिन्छ । सेतो प्याउली घाँस पटक पटक काटेर अथवा चराएर खुवाइने भएकोले, यो घाँसमा रोग तथा किराको खासै समस्या देखिदैन।

यस घाँस लाई मध्य पहाड देखि उच्च पहाड सम्म सफलतापुर्वक लगाउन सकिन्छ । उच्च पहाडी भेगमा हिउँ पग्लेपछि चैत्र वैशाखमा तथा मध्य पहाडी भेगमा जेष्ठ असार महिनामा प्रती रोपनी २५० ग्राम बिउका दरले लगाउन सकिन्छ । रोपेको चार महिनापछि पहिलो कटाई र त्यसको एक डेढ महिनाको अन्तरालमा ३–४ पटकसम्म कटाई गर्न सकिन्छ । यो घाँसको बाली व्यवस्थापन तथा लगाइने क्षेत्र अनुसार प्रति रोपनी १.५ देखि २.५ टनसम्म हरियो घाँस तथा ६ किलो सम्म बिउ उत्पादन हुन्छ । यो घाँसमा सरदर २०% सम्म क्रुड प्रोटिन पाइन्छ ।