फल टिपेपछिका कर्महरू

टिपेका फल छहारीमुनि राखेर वर्गीकरण गर्नुपर्छ । कुल घुलनशील पदार्थका आधारमा ८ % भन्दा कम नभएका फललाई गुलिया र १० % भन्दा माथि भएकालाई धेरै गुलिया समूहमा राख्न सकिन्छ । तौल र आकारका आधारमा पनि वर्गीकरण गरिन्छ । यसका फललाई पोका पार्न कार्टुन र बिनहरूको प्रयोग गरिन्छ । लम्बाइ ६५ से.मि., चौडाइ ५० से.मि. र २५ से.मि. उचाइ भएका कार्टुनमा ३–५ फल राख्न सकिन्छ । लम्बाइ १२० से.मि., चौडाइ १०० से.मि र उचाइ ९० से.मि. भएका फाइवर बोर्ड बिनमा ५० वटा फल राख्न सकिन्छ । सोझै ट्रकमा फलहरू राखेर ढुवानी गर्नको लागि पराल ओछ्याउनुपर्दछ । तापक्रम ३२ डि.से. भन्दा बढी भएमा फलको भित्री भाग बिग्रन थाल्दछ । तरबुजा ढुवानी गर्दा वायुको तापक्रम १३–२१ डि.से. र हावा खेल्ने हुनुपर्दछ ।