बाली लिने

जात अनुसार ७०–९० दिनमा पहिलो फल टिप्न सकिन्छ । तरबुजाको फल बोटमा पूरा पाकेपछि टिप्नुपर्दछ । नपाकेको फल टिपेर राखेर पाक्दैन । पूरा पाक्ने समय अन्दाज गर्ने केही सूचकहरू छन्, ती यहाँ उल्लेख गरिएको छ । फूल लागेको करिब ३०–४० दिनमा फल पूरा पाकेको हुन्छ । जात र मौसम अनुसार बीउ रोपेको ६५–१०० दिनमा फल टिप्ने बेला हुन्छ । फल लागेको आँख्लामा भएको त्यान्द्रा सुकेपछि फल पाकेको हुन्छ । भूइँमा छोइएको फलको भाग पहेंलो रंगको भएपछि फल पुरा पाकेको भन्ने बुझिन्छ । फल पाकेपछि फलको बाहिरी सतहमा नङ गाड्न सकिन्छ । फल पाकिसकेपछि फलको बाहिरी सतह छुँदा खस्रो लाग्दछ । फलको केन्द्र भागको गुदीमा १० % कुल घुलनशील पदार्थ हुन्छ । औंलाले फलमा हान्दा काँचो फलबाट तीखो आवाज र पाकेको फलबाट बोधो आवाज आउँछ । यी तरिकाहरूबाट जाँच गरेर फल पाकेको भन्ने पक्का भएपछि लाग्ने चक्कुले फलको भेट्नु काटेर फल टिप्नुपर्दछ ।