वानस्पतिक विवरण र जातहरू

तरबुजा फर्सी समूहका अन्य बाली जस्तै लहरे बाली हो । तरबुजामा पनि भाले फूल र पोथी फुल अलग–अलग स्थानमा हुन्छ र सेचनको आवश्यकता पर्दछ । तरबुजाको जात छान्दा कुन उद्देश्यको लागि लगाउने हो । सोही अनुरुप जात छनौट गर्नु पर्दछ । घरको लागि र स्थानीय बजारको लागि लगाइने हो भने सबभन्दा राम्रो गुण स्तरको छान्नुपर्छ । यदि टाढाको बजारका लागि लगाउने हो भने नफुट्ने र बलियो बोक्रा भएको र उच्च गुणस्तरको जात छान्नु पर्दछ ।

नेपालमा प्रचलित जात सुगर बेबी हो | यसको फल गोलो र ३–५ के.जी. तौलसम्मको हुन्छ । यसको गुदी एकनासको गाढा रातो रंगको हुन्छ । यसको रसमा कुल घुलित पदार्थ ११–१३ प्रतिशत हुन्छ र बिउ साना खैरा रंगका हुन्छन् । अरू खेती गरिने जातहरूमा असाही यामतो, असाही मियाको, गोल्ड बानी र ग्लोरी प्रमुख हुन् । राष्ट्रिय बीउ बिजन समितिले २०६६ सालमा वर्णशंकर जातहरू लक्ष्मी ७४७ र लक्ष्मी ७६७ तराई क्षेत्रमा खेती गर्नको लागि पञ्जिकृत गरेको छ ।