परिचय र महत्व

तरबुजाको उत्पत्ति अफ्रिकी महादेशबाट भएको मानिएको छ । तरबुजा ताजा फलको लागि खेती गरिन्छ । तरबुजा लहरा जाने फल हो ।तरबुजा गर्मी मौसममा खेती गरिने लहरे बाली हो । यसको खेती गुलिया, रसिला पाकेका फलको लागि गरिन्छ । यो ताजा अवस्थामा खाने फल हो । पाकेका तरबुजाको गुदी रातो वा हल्का पहेंलो रंगको हुन्छ । गर्मी मौसममा पाकेको तरबुजाको प्रयोगले शरीरलाई शीतल पार्दछ । यसको औषधीय महत्व छ । यसले पेटमा कब्जियत हुन दिँदैन र अल्सर, जन्डिसजस्ता रोगलाई निको पार्दछ । तरबुजाको उद्गमस्थल अफ्रिकाको उष्ण क्षेत्र हो । नेपालका खोंच, बेसी, तराई, भित्री तराई र नदीहरूका बगरमा तरबुजाको खेती गरिन्छ । बजारको मागले गर्दा यसको उत्पादन र आर्थिक महत्व बढ्दै गएको छ । तरबुजामा ३ देखि १३ प्रतिशतसम्म गुलियो वस्तु भिटामिन ए.बी.सी. र क्याल्सियम पाइन्छ । यसमा झण्डै ८५ देखि ९० प्रतिशत पानी हुन्छ । तरबुजा पाकेपछि यसको खाने गुदी रातो या क्रिम रङ्गको हुन्छ ।