बालीका कर्महरू तथा उत्पादन

बालीका कर्महरू
भान्टा जात अनुसारको फलको साइज पुगेपछि र आकर्षक रंग छँदै टिप्नुपर्दछ । बेलुकापख कैंचीको सहायताले फल टिप्नुपर्दछ । टिपेका फल डालो वा टोकरीमा राख्नुपर्दछ । टिपेका फल घाममा राख्नु हुँदैन र गवारोले प्वाल पारेका, घाउचोट लागेका, बढी छिप्पिएका र आकर्षक नभएका फलहरू हटाउनुपर्दछ । यसलाई फलको आकार अनुसार ग्रेडिङ गर्न सकिन्छ । बजारयोग्य डोको वा बोरामा राखेर स्थानीय बजारमा पुर्याउन सकिन्छ । टाढाको बजारका लागि क्रेटमा राखेर ढुवानी गर्नु उपयुक्त हुन्छ । भान्टाका फिका वा कालो रंगका ठूला फल ग्राहकले मन पराउँदैनन् । ग्राहकले साना, मसिना, लामा तथा गोला आकारका चम्किला बैजनी राता वा गाढा बैजनी रंगका फलहरू मन पराउँदछन् । भान्टा टिपेपछि छिटो बिक्री गर्नुपर्दछ । ग्रीष्मयाममा बाली टिपेको ३ दिनभित्र जाडो याममा ५ दिनभित्र भान्टा बेचिसक्नुपर्दछ । प्लास्टिक खुला झोलामा राखेर भान्टाको ताजापन १–२ दिन बढी जोगाउन सकिन्छ । भान्टालाई ७–१० डि.से. तापक्रम र ९०–९५% को आद्र्रतामा ७–१० दिन भण्डार गर्न सकिन्छ ।

उत्पादन
सरदर एक रोपनी जमिनबाट वसन्त–ग्रीष्मयाममा १५०० के.जी. र वर्षा–जाडो याममा २०००–२५०० के.जी उत्पादन गर्न सकिन्छ ।