परिचय तथा महत्व

भान्टा न्यानो तथा गर्मी मौसममा महत्वपूर्ण तरकारी बाली हो । यसका कलिला फलहरू बजारमा वर्षभरि नै पाइन्छन् । कलिला भान्टाका चाना तारेर वा आलु र गोलभेंडासँग मिसाएर तरकारी पकाएर खाने गरिन्छ । यो पोषिलो तरकारी हो । यसको सेवनले रगतमा हुने कोलेस्ट्रोलको मात्रा घटाउने तथा दाँत दुख्ने, कलेजो र मधुमेहका रोगीलाई औषधिको काम गर्दछ ।

भान्टाको उद्गमस्थल चीन, नेपाल र भारतका उष्ण र उप–उष्ण क्षेत्रहरू हुन् । प्राचीन समय देखि यसको खेती गरिँदै आएको छ । नेपालका सबै जिल्लाहरूमा भान्टाको खेती गरिन्छ । व्यावसायिक रूपमा खेती गरिने पकेट क्षेत्रहरू सर्लाही, महोत्तरी, पर्सा, बाग्लुङ, म्याग्दी, कपिलवस्तु, बाँके, बर्दिया, दैलेख र कैलाली जिल्लामा छन् । नेपालका खोँच, बेसी, तराई र भित्री तराईमा ग्रीष्म–वर्षायाममा लिने भान्टा लाभदायक हुन्छन् ।