परिचय

ब्रोकाउली काउली बाली समूहको सबैभन्दा पोषिलो र स्वादिलो बाली हो । नेपालको तराई तथा मध्य पहाडी क्षेत्रमा यसको खेती जाडो मौसममा गरिन्छ भने उच्च पहाडी क्षेत्रमा ग्रीष्म वर्षायाममा गरिन्छ । हरिया फूलका कोपिलाहरू लटरम्म भएका नरम रसिला र कलिला डाँठहरूको शीर्षस्थ झुप्पा नै ब्रोकाउलीको खाने भाग हो । ब्रोकाउली काँचै सलादको रूपमा तरकारी पकाएर वा सुप बनाएर सेवन गरिन्छ । अरू काउली समूहका बालीको तुलनामा ब्रोकाउली क्याल्सियम, फलाम, भिटामिन ए र भिटामिन सी मा बढी धनी छ । यसमा क्यान्सर रोगको प्रतिरोध गर्ने अरू तरकारी बालीको तुलनामा सबभन्दा बढी हुन्छ । ब्रोकाउलीको उद्गमस्थल दक्षिण युरोप र पूर्वी भूमध्यसागरीय क्षेत्र हुन् । नेपालमा यसको खेती गरिने क्षेत्रफल र उत्पादन बढ्दै गएको छ । आन्तरिक र निर्यात बजारको लागि ब्रोकाउली मौसमी र बेमौसमी खेती गरेर आय आर्जन गर्न सकिने प्रशस्त अवसरहरू छ ।